L´actor americanu de 39 años Gale Harold, conocíu pol so papel de Brian Kinney en la serie “Queer as Folk”, ta ingresáu nun hospital n´estáu grave tres sofrir un accidente de motu. L´accidente prodúxose´l pasáu martes y l´actor, protagonista de la serie más gai de la historia, foi ingresáu con un hombru frayáu y traumatismu craneoencefálicu. Anguaño Gale Harold facía un papel na quinta temporada de “Muyeres Desesperaes” interpretando al mozu de Susan Mayer. L´accidente podría obligar a camudar dalgunes de les histories de la serie que n´España emiten La 2 y Fox.
Ivri Lider ye un de los cantantes más conocíos d´Israel, amás d´un activista de los drechos gais nel so país. Entamó la so carrera musical nel institutu y en 1997 robló cola compañía Helicon pa entamar a trabayar nel so primer álbum (Melatef Umeshaker”/ Acariciándome y mintiéndome), col qu´algamó´l discu de platinu n´Israel.
Dempués d´espublizar el so segundu discu (“Yoter Tov Klum Mikinát”/Meyor nada que casi) ganó en 2000 el premiu que da la industria discográfica d´Israel al artista del añu. Tres algamar el discu d´oru por vender 30.000 copies del so tercer álbum "Ha'anashim Hajadashim" ("La nueva xeneración"), Ivri decidió salir del armariu y concedió una entrevista al periódicu “Ma´ariv” onde faló abiertamente de la so sexualidá.
En 2002 compuso la música de película d´Eytam Fox “Yossi y Jagger”, onde versionó´l tema “Bo” (Ven) de la estrella del pop israelí Rita. Ivri tamién compuso la música pa les posteriores películes de Fox: “Caminar sobre les agues” (onde versionó´l tema “Cinderella Rockefella” con Rita) y “La Burbuya” (col tema “The man I love”).
Tres una carrera enllena d´ésitos, premios y cinco discos que diben innovando con soníos nuevos, en 2007 Ivri participó nel discu "Revolutions”, espublizáu nos Estaos Xuníos y qu´inclúi una esbilla de promeses de la música LGBT. Ivri Lider col tema "Jesse" ye l´únicu cantante non estaoxunidense que participa nel discu.
Préstame muncho Jesse
Pero Jesse nun me cuerrespuende
Diz que la so moza vive en Chelsea
Y que la quier muncho.
Préstame muncho Jesse
Pero Jesse nun me cuerrespuende
Diz que ta inseguru
De lo que siente y lo que quier.
Pero cada vez 1ue me mira y sonríe
Pueo ver que somos iguales
Nun ties que decir que visti la vida que m´escoyeron.
Préstame muncho Jesse
Pero Jesse nun me correspuende
Quier un besu
Dirse a la cama
Y nun falar d´ello
Préstame muncho Jesse
Pero Jesse nun me cuerrespuende
Diz que ye heteru
Que yo lo malinterpretu
Que too ta na mio mente
Tolo pueo esconder
Toi faciéndolo bien
Pero cada vez
Que me mira y sonríe
Pueo ver que somos iguales
Y si camudara´l so mundu por min
Si namás supiera´l mio nome.
Préstame muncho Danny
Pero Danny nun me cuerrespuende
Diz que la so moza vive en Chelsea
Y que la quier muncho.
Préstame muncho Danny
Pero Jesse nun me cuerrespuende
Diz que ta inseguru
De lo que siente y lo que quier.
Esti ye´l triángulu rosa, un símbolu gai que surdió n´Alemania nazi pa identificar a los presos en campos d´esterminiu que foron encarcelaos pola so condición d´homosexuales. Anguaño, el reverendu Peter Mullen, capellán de la bolsa de Londres (que coses que relixón, homofobia y perres a esgaya siempre van de la mano) quier que los gais seyamos marcaos con tatuaxes, p´asina alvertir a la sociedá de los peligros que tenemos. Según él, somos iguales o peores que´l tabacu y habría que ponenos un tatuaxe na espalda onde pudiera lleese "la sodomia pue dañar la salú" o "la felación mata".
Drama, México, 2006. 144 m. Dirección; Julián Hernández. Repartu: Miguel Ángel Hoppe, Fernando Arroyo, Alejandro Rojo, Clarisa Rendón
ARGUMENTU: La película cuenta la historia d´amor de Gerardo y Jonás, unos estudiantes que viven el so amor como un cuentu de fades nun México que paez dafechu tolerante haza´l mundu gai. Una nueche que los dos salen de folixa, Jonás bailla con otru mozu del qu´acaba obsesionándose, entós Jonás entama a refugar a Gerardo, colo que la convivencia camuda n´insoportable, sobre too pa Gerardo que sigui amando allocadamente a Jonás. Pero entós apaez Sergio na vida de Gerardo.
CRÍTICA: Película ensin muncho diálogu ya inclús per momentos agobiante, pero hai vegaes qu´una mirada val más que milenta pallabres, ¿y qu´hai más agobiante que l´amor nun correspondíu?. Hai un narrador que va introduciendo dalguna de les escenes, pero la película entiéndese por si sola anque inclúi dalgunes metáforas (los mozos viven el so amor llibremente ensin escondese de nadie, namás hai una escena onde una pareya heteru velos besándose y ríense al entamu de la cinta).
La falsa moral de facer un cantar nidiamente gai y preferir amosar nel vidioclip l´amor ente una profesora y un escolín, que paez que la sociedá acepta meyor la pederastia qu´a dos tios morreándose
Pases un fin de selmana en Madrid, la visita a Chueca nun pue faltar. Anque te sientes como Paco Martínez Soria versión gai respires llibertá, tolerancia, éntrante ganes de quedate a vivir (anque tendría que renovar tol fondu d´armariu, qu´equí van de punta en blancu hasta pa mercar el pan). Tu tamién quies pasear tranquilu pela cai yendo de la mano col to mozu (anque pa eso tendría que char mozu). Ye un mundu al revés, ye´l to mundu. Pienses que la sociedá entama aceptar daqué que tendría que ser normal cuantayá, que muncho s´avanzó, que madre mia vaya maromos qu´hai per equí.
Finó´l fin de selmana, garres el bus de vuelta a Asturies, arranca, pónente una peli que fai risión de que dos homes puedan casase (chiste del xabón na ducha nun pue faltar), cagaste na madre del conductor, del director, de los actores, de la moral heterosexual y quies montar una griesca de la virxe col conductor pola ofensa que te supón esa película, pero pones el MP3 cola música al altu la lleva ya faes por dormir, nun vaya ser que too dios s´entere de que yes gai. Y encabronáu atalantes que pel momentu hai que vivir nuna especie de ghettu pa poder ser como tu yes. Y encabronáu vuelves pa casa cola caxa de condones ensin abrir.
Esbilla
del.icio.us
