Tiempos meyores

Dende fai selmanes Youtube ufre recomendaciones de videos a tolos usuarios rexistraos. Según los vidios que veas, el servidor esbilla trés d’ente la montonera de los qu’hai. A min yá me recomendaron vidios de lo meyor de la música gai, dalgún de Monica Naranjo, besos ente dos homes, trailers de pelis de temática LGTB, manifestaciones del arguyu… Sicasí, dengún d’una mani pola oficialidá o d’un actu de la Pita, y mira qu’ando güeyando más d’estos últimos que de los primeros. Entós vienme una entrega; ¿que ta peor vistu, ser un sodomita o un asturianista?, ¿la xente oculta la so ideoloxía asturtxale ante la mayoría anti-dixebriega?, ¿tendrá l’asturianismu qu’entamar a salir del armariu?, ¿qué mos queda a los gais asturtxales nun mundu heteru y españolista?.

Lo de ser una diva tien el so aquel, vas tener una montonera de llocaces tres de ti siguiendo los tos pasos, sollertes a tolos tos movimientos. Un garapiellu de fans que van tar siempre contigo, mercando tolo que saques y defendiéndote faigas lo que faigas. Pero namás vas ser una diva, pasar a la historia de la música, si yes una diva gai. Y has ganalo col sudor de la to frente…

AMOR Y LUJO (MÓNICA NARANJO)

TODOS ME MIRAN (GLORIA TREVI)

I WILL SURVIVE (MARTA SÁNCHEZ)

Tamién pues tener la suerte de que seyas la interprete del himnu gai d’un Estáu, entós podrás inclús ser colaboradora de Jiménez Losantos y escribir en Libertad Digital, entós con salir na mani del Arguyu cola banderina del arcu la vieya, y movela cuando ves cámares, yá abonda…

Espiertes, prendes la radio, ganó Obama, un fechu históricu, el fin del conflictu racial nos Estaos Xuníos. El presidente entamó’l so discursu falando de que diba ser un mandatariu pa toos: blancos y negros, mozos y vieyos, ricos y probes, homos y heteros.

Mientres, a lo llargo de tolos Estaos Xuníos, sobre manera en California, Arizona, Florida y Arkansas, miles de persones teníen que ver como los sos drechos yeren recurtiaos, como nun-yos consideraben persones n’igualdá de condiciones. Una discriminación cola qu’Obama ta dalcuerdu.

Pases un fin de selmana en Madrid, la visita a Chueca nun pue faltar. Anque te sientes como Paco Martínez Soria versión gai respires llibertá, tolerancia, éntrante ganes de quedate a vivir (anque tendría que renovar tol fondu d´armariu, qu´equí van de punta en blancu hasta pa mercar el pan). Tu tamién quies pasear tranquilu pela cai yendo de la mano col to mozu (anque pa eso tendría que char mozu). Ye un mundu al revés, ye´l to mundu. Pienses que la sociedá entama aceptar daqué que tendría que ser normal cuantayá, que muncho s´avanzó, que madre mia vaya maromos qu´hai per equí.

Finó´l fin de selmana, garres el bus de vuelta a Asturies, arranca, pónente una peli que fai risión de que dos homes puedan casase (chiste del xabón na ducha nun pue faltar), cagaste na madre del conductor, del director, de los actores, de la moral heterosexual y quies montar una griesca de la virxe col conductor pola ofensa que te supón esa película, pero pones el MP3 cola música al altu la lleva ya faes por dormir, nun vaya ser que too dios s´entere de que yes gai. Y encabronáu atalantes que pel momentu hai que vivir nuna especie de ghettu pa poder ser como tu yes. Y encabronáu vuelves pa casa cola caxa de condones ensin abrir.

El mio pá entrugó: ¿yes gai?/ Yo entrugué, ¿importa?/ Dixo: non, nun daveres./ Dixi-y que sí, asina yera.
Díxome: Fuera de la mio vida/ Paezme que sí importaba

El mio xefe entrugó: ¿yes gai?/ Yo entrugué, ¿importa?/Dixo: non, nun daveres./ Yo dixi-y: sí, asina ye.
Díxome: tas despedíu/ Paezme que sí importaba

El mio amigo entrugó: ¿yes gai?/ Yo dixi: ¿importa?/ Dixo: non, en verdá non./ Dixi-y: Sí.
Díxome: nun me llames el to amigu/ Paezme que sí importaba.

La mio pareya entrugó. ¿Ámasme?/ Entrugué-y: ¿importa?/ Díxome: sí. / Dixi-y: sí, ámote.
El dixo. Déxame abrazate./ Por primer vez na mio vida, daqué importaba.

Dios entrugóme: ¿quieste?./ Dixi-y: ¿importa?./ El dixo: sí./ Y dixi: ¿cómo pueo quereme si soi gai?.
Díxome: asina ye como te fici.

Dende entós nada volvió importar

Llevó díes fixándome en ti. Nun pueo dexar de mirate, esos brazos da gloria velos. Cuando llevantes eses peses de venti quilos, ¡dios!, lo que daría por sentime ente esos brazos. Y les berríes que metes al facer l´últimu esfuerciu. Entames a glayar zarrando los güeyos y apretando´l dentame, si paez que tas a puntu de corre… ¡Dios!, pónesme malu. Vánseme los güeyos y nun tien igua. Yá me pillaste dalguna vegada, pero bono, ¡si colos ruíos que faes tola peña mira pa ti!.

Güei viniste falar conmigo. “Sí, usa la maquina mientres faigo los descansos”, díxite. La conversación nun daba pa más. Entames a meter pequeños glayíos al empar que les boles de los brazos entamen a hinchase. Miro esi brazu mientres espero qu´acabes, entós miró pal espeyu, toles paredes del ximnasiu son d´espeyu, y veo que me mires, agacho la cabeza y miro pa otru llau.

Cuando fino cola máquina marchó a facer peses. Al poco apareces y tamién entames a facer peses, y a berrear… De vez en cuando mírote al traviés del espeyu, y tas mirándome… Llevántome pa facer un exerciciu, tu yá tabes de pie. Entamó colos mios peses de cinco quilos mientres tu yá acabasti colos de venti. Entós, llevantes la manga de la camiseta, póneste a mirar los bíceps y a sacar bola. ¡Diooooooooos!. Mírote, me mires de regüeyu, mírote, me mires de regüeyu...

Yá malu, marchó facer abdominales, terminu y xubo a una bici, al poco vuelves aparecer. ¡Tas siguiéndome!, a ver babayu que lleves equí un bon cachu, ye´l tiu más bonu de tol ximnasiu y tu… yes tu. Nun te voi mirar, ¡si yes un creíu!, quies que te miren y col cuentu yo yá toi too rayáu. Paso de mirate, nun te voi mirar más. Y tu vas y te pones a mirate del espeyu, yes un creíu, vaya creíu, ¡dios!, llevantes la camiseta y enseñes esa tableta de chicolate. Nun mires, nun mires. ¡¡¡Ta mirándome de regüeyu otra vez!!!

Marchó pa la cinta, ellí aisllada, nel pasiellu pa salir del ximnasiu y col espeyu delantre, nun hai naide más, toi solu. Soi un flipáu, soi flipadísimu, lo que-y pasa a esi ye que ye un creíu y diz “voi da-y envidia al minguín esi que-y cuesta llevantar les peses de cinco”. Y si ta mandándome señales… a ver, que ye´l tiu más bonu de tol ximnasiu, un tiu con esos brazos va querer “tema” contigo, sigui suañando. Entós veóte al traviés del espeyu, marches yá y ensin parar de caminar llevantes la manga, saques bola y mírasme de regüeyu. Desapareces del espeyu. Quedo cola boca abierta.

¿Qué ¿coñu? quies?