Tiempos meyores

Sean Penn ye’l protagonista de “Milk”, película dirixida por Gus Van Sant y que tovía nun estranada n’Asturies. Na cinta nárrase la vida de Harvey Milk, el primer políticu estaoxunidense abiertamente gai. L’actor, dempués de ver que na primer versión del guión namás qu’había un besu ente dos homes, forció a los guionistes a meter escenas de sexu.

Harvey Milk foi elexíu “city supervisor” de la ciudá de San Francisco en 1977, un cargu qu’exerció nel distritu gai de la ciudá. Foi miembru de l’Asamblea Estatal de California y sobresalió pola so defensa de los drechos gais. Milk foi asesináu en payares de 1978 xunto a George Moscone, alcalde de San Francisco, por Dan White, otru conceyal.

Drama, México, 2006. 144 m. Dirección; Julián Hernández. Repartu: Miguel Ángel Hoppe, Fernando Arroyo, Alejandro Rojo, Clarisa Rendón

ARGUMENTU: La película cuenta la historia d´amor de Gerardo y Jonás, unos estudiantes que viven el so amor como un cuentu de fades nun México que paez dafechu tolerante haza´l mundu gai. Una nueche que los dos salen de folixa, Jonás bailla con otru mozu del qu´acaba obsesionándose, entós Jonás entama a refugar a Gerardo, colo que la convivencia camuda n´insoportable, sobre too pa Gerardo que sigui amando allocadamente a Jonás. Pero entós apaez Sergio na vida de Gerardo.

CRÍTICA: Película ensin muncho diálogu ya inclús per momentos agobiante, pero hai vegaes qu´una mirada val más que milenta pallabres, ¿y qu´hai más agobiante que l´amor nun correspondíu?. Hai un narrador que va introduciendo dalguna de les escenes, pero la película entiéndese por si sola anque inclúi dalgunes metáforas (los mozos viven el so amor llibremente ensin escondese de nadie, namás hai una escena onde una pareya heteru velos besándose y ríense al entamu de la cinta).

Drama, Israel, 2002. Dirección; Eytan Fox. Repartu: Ohad Knoller (Yossi), Yehuda Levi (Jagger), Assi Cohen (Oficial), Sharon Reginiano (Coronel), Aya Koren (Yaeli), Hani Furstenberg (Goldie), Yuval Semo (Psycho), Yaniv Moyal (Samocha), Hanan Savyon (Adams), Erez Kahana (Yaniv).

ARGUMENTU: Basada en fechos reales, Yossi y Jagger narra una historia d´amor ente dos miembros del exercitu israelí nuna bas asitiada na llenda llibanesa. Yossi ye´l comandante de la compañía, quier mantener el so amor en secretu y siguir sirviendo al so país. Yagger ye´l xefe del pelotón, quier acabar el serviciu y que Yossi marche con él.

CRÍTICA: Versión hebrea de Brokeback Mountain. La cinta narra´l amor gai dende dos posiciones enfrentaes, el que quier vivir el so amor en llibertá y ser féliz (Jagger) y el que vive l´amor con mieu y ocultándose tres l´amistá por mieu a ser consideráu menos “machu” (Yossi). La película ye crítica col exercitu israelí y la obligatoriedá del serviciu militar (3 años pa los homes y 21 meses pa les muyeres), asina´l filme amuesa como los personaxes ven como los sos años mozos vanse en mediu d´una guerra mientres faen planes de futuru dientro d´un conflictu del que nin siquiera falen. La película dura una hora, lo que quiciabes fai que nun-y llegues a garrar ciñu a los personaxes, pero pue llegar a cayete la llarimina.